UMATI WAFURIKA KUMUAGA DIWANI KATA YA ITWANGI

Posted on: October 7th, 2024

Wajumbe wa Baraza la Madiwani wa Halmashauri ya Wilaya ya Shinyanga, Mkuu wa Wilaya ya Shinyanga na Watumishi leo Oktoba 7, 2024 wamemsindikiza katika makazi yake ya kudumu aliyekuwa Diwani wa Kata ya Itwangi Mhe Sonya J Mhela ambaye amezikwa katika makabuli ya familia yaliyopo Kijiji Cha Itwangi.

Ibada ya kumuaga Mhe. Sonya imeongozwa na Mchungaji Richard Mashauri ambaye ni Katibu Mkuu wa Kanisa la Adventista Wasabato Jimbo la Nyanza Gold Belt Field ametoa neno la faraja kwa familia kutoka kitabu cha Ayubu 14:1 ambalo linakumbusha mwanadamu aliyezaliwa na mwanamke siku zake za kuishi duniani si nyingi.

"umepewa uhuru wa kuchagua kuamini ama kumkataa Yesu kuwa bwana na mwokozi wetu na hakika watakao mchagua watafanyika wana na kwamba ibada  ya kumuaga ndugu yetu Sonya ni ibada ya sisi tuliobaki hai" aliongeza mchungaji Mashauri

Kwa upande wake Mkuu wa Wilaya ya Shinyanga,  Wakili Julius Mtatiro akitoa salamu za Mkoa na Wilaya amesema  siku ya kumpumzisha Marehemu Sonya imekuwa siku  ngumu kwa Kila mmoja na  asingeweza kuandaa  hotuba ndefu zaidi ya maneno ya faraja yaliyotolewa na viongozi wa kiroho .

"jambo la  muhimu ni kumuombea marehemu apumzishwe salama na kwamba funzo pekee ni kuendelea kutii maelekezo ya watumishi wa kiroho ikiwa ni kutenda matendo mema na kumcha Mungu"

Aidha Wakili Mtatiro ameongeza kuwa kuondoka kwa Diwani Sonya sio mwisho wa Serikali kutoa huduma katika kata ya Itwangi na kwamba yote yaliyoanzisha yatakamilishwa.

Naye Ndg. David Rwazo  kwa niaba ya Mkurugenzi Mtendaji wa Halmashauri ya Wilaya ya Shinyanga ametoa salamu za pole kwa familia, ndugu, jamaa na marafiki wa

liofika kwenye msiba huo.

 Akimzungumzia marehemu wakati wa uhai wake  amesema atakumbukwa kwa  kuisimamia vyema  miradi ya maendeleo katika kata yake na halmashauri kwa ujumla.

Akizungumza kwa niaba ya Watumishi wa Kata ya Itwangi Afisa elimu wa kata Ndg  Ashery essero Mafuru  amesema  kata imempoteza mpambanaji na kiongozi madhubuti  aliyeweza kumsaidia kila mwananchi hivyo wataendelea kuyaishi  na kuyaenzi maisha yake.

Wakati wa uhai wake Mheshimiwa Sonya Mhela alishika nyadhifa mbalimbali kama katibu wa wazazi kata ya Itwangi, mwenyekiti wa Kijiji Itwangi, mwenyekiti wa kamati ya uchumi ya Wilaya na mpaka umauti unamfika alikuwa Diwani wa Kata ya Itwangi na Mwenyekiti wa Kamati ya Uchumi Ujenzi na Mazingira.

Mheshimiwa Sonya alifariki Dunia Oktoba 4, 2024 katika Hospital ya Rufaa Bugando alikokuwa anapatiwa matibabu.