TATHMINI YA UTEKELEZAJI WA HALI YA LISHE WILAYA YA SHINYANGA KWA KIPINDI CHA NUSU MWAKA JULAI /DISEMBA 2023

Posted on: March 3rd, 2024

Mkuu wa Wilaya ya Shinyanga, Mhe. Johari Samizi amewataka Watendaji Kata na Maafisa Elimu wa Halmashauri mbili za Wilaya ya Shinyanga kusimamia utekelezaji wa mpango wa chakula mashuleni ili kukuza kiwango cha ufaulu. Hayo ameysema wakati wa kikao cha Tathmini ya Mkataba wa Lishe kwa kipindi cha nusu mwaka Julai hadi Disemba, 2023  kilichofanyika katika ukumbi wa mikutano wa Manispaa ya Shinyanga Machi 01, 2024. Kikao hicho kimejumuisha watalaam kutoka ofisi ya Manispaa ya Shinyanga na Halmashauri ya Wilaya aya Shinyanga.

“ Kuna mahusiano ya moja kwa moja kati ya chakula na ufaulu wa masomo kwa watoto.Tafiti zinaonyesha watoto wanaopata chakula mashuleni wanafanya vizuri katika masomo, shirikisheni  wazazi na  tuendelee kutoa elimu kwa wazazi  hao kuhusu umuhimu wa watoto kupata chakula mashuleni...” alisisitiza Mhe. Samizi.

Akitoa taarifa ya utekelezaji wa shughuli za lishe katika Halmashauri ya Wilaya ya Shinyanga, Afisa Lishe wa halmasahuri hiyo, Bw. Said Mankligo amesema kuwa katika kipindi  cha nusu  mwaka Julai hadi Disemba, 2023, halmashauri imefanya shughuli za usimamizi  na utekelezaji wa mkataba wa Lishe . Shughuli hizo ni pamoja na utoaji wa nyongeza ya matone ya Vitamin A, dawa za minyoo na upimaji wa lishe kwa watoto chini ya miaka 5 uliofanyika katika kampeni ya mwezi Disemba 2023 kwa watoto 67,959 kati ya watoto waliotegemewa 67,951 sawa na 100.01%.

Shughuli zingine ni  utoaji wa vidonge vya kuongeza wingi wa damu (FEFO) kwa wajawazito wanahudhuria kliniki  katika vituo vya kutolea huduma za afya, upimaji wa hali ya lishe na matibabu ya utapiamlo mkali, utoaji wa elimu  ya unyonyeshaji na unasihi wa ulishaji sahihi wa chakula cha nyongeza kwa watoto.

Kwa upande wake, Mkurugenzi Mtendaji wa Halmashauri ya Wilaya Shinyanga amewataka Watendaji wa Kata kuhakikisha kuwa wanasimamia uanzishaji vitalu vya viazi lishe katika maeneo ya shule na kusimamia maelekezo yote yaliyotolewa na Mwenyekiti wa Kamati ya Lishe ya Wilaya ambaye ni Mkuu wa Wilaya hiyo ili kuwezesha mafanikio katika mpango wa Taifa wa masuala ya Lishe.

Mpango wa upatikanaji wa chakula mashuleni ni mojawapo ya afua inayolenga kuongeza afya za wanafunzi na kupunguza utoro mashuleni ikiwa ni Utekelezaji wa Mpango Jumuishi wa Kitaifa wa Masuala ya Lishe “National Multasectoral Nutrition Action Plan” (NMNAP) ambao ni  sehemu ya utekelezaji wa Sera ya Taifa ya Lishe na Mkakati wa  miaka kumi (2015/16 – 2025/26). Mpango huo umeainisha afua mbalimbali za lishe zinazopaswa kutekelezwa nchini kwa lengo la kupambana na utapiamlo katika aina zake zote.

Mkuu wa Wilaya ya Shinyanga, Mhe. Johari Samizi akifungu kikao cha Tathmini 

ya Mkataba wa Lishe kwa kipindi cha nusu mwaka Julai hadi Disemba, 2023 

kilichofanyika katika ukumbi wa mikutano wa Manispaa ya Shinyanga Machi 01, 2024

Baadhi ya wajumbe wa kamati ya Lishe wakifuatilia kwa makini wakati wa kikao hicho

Afisa Lishe wa Halmashauri ya Wilaya Shinyanga, Bw. Said Mankligo akiwasilisha 

 taarifa ya utekelezaji wa shughuli za lishe katika Halmashauri ya Wilaya ya Shinyanga 

kwa kipindi cha nusu mwaka Julai hadi Disemba, 2023