PROGRAM JUMUISHI YA TAIFA YA MALEZI,MAKUZI NA MAENDELEO YA AWALI YA MTOTO YAZINDULIWA HALMASHAURI YA WILAYA YA SHINYANGA

Posted on: February 8th, 2024

Mkurugenzi Mtendaji wa Halmashauri ya Wilaya ya Shinyanga Ndg. Kisena Magena, amezindua rasmi programu Jumuishi ya Taifa ya Malezi, Makuzi, na Mendeleo ya Mtoto (PJT-MMMAM). Uzinduzi huo umefanyika Februari  08, 2024 katika ukumbi wa mikutano wa Halmashauri na kuhudhuriwa na Mwenyekiti wa Kamati ya Afya, Elimu na Maji ambaye pia ni Diwani wa Kata ya Iselamagazi, Mhe. Isack Sengerema na wadau wengine.

 Lengo la programu hii ni kutoa huduma jumuishi kwa watoto katika maeneo mbalimbali, ikiwa ni pamoja na afya, lishe, fursa za uwekezaji wa awali, malezi ya mwitikio pamoja na ulinzi na usalama kwa watoto wenye umri wa miaka sifuri hadi nane.

Akizungumza katika  uzinduzi huo,  Ndg. Mabuba alisema Programu hii ni juhudi muhimu za kuimarisha huduma za kijamii kwa watoto kuanzia umri wa miaka sifuri hadi nane. Programu hiyo pia inalenga kuhakikisha kuwa watoto wanapata fursa bora za makuzi na malezi, pamoja na ulinzi dhidi ya hatari zozote zinazoweza kuwakabili. Uzinduzi huu ni hatua muhimu katika kuhakikisha ustawi na maendeleo bora ya watoto katika Halmashauri ya Wilaya ya Shinyanga.

Aidha, Ndg. Mabuba amesisitiza kuwa ulinzi na usalama wa mtoto ni jukumu la kila mzazi kuhakikisha wanafichua  na kulipoti matukio ya vitendo vya ukatili wanavyofanyiwa watoto ili hatua kali ziweze chukuliwa dhidi ya watakaobainika kufanya vitendo hivyo.

Awali, akiwasilisha mada, Mratibu Afya, Uzazi na Watoto Mkoa wa Shinyanga, Bi. Halima Hamis amesema lengo kuu  la  uanzishaji wa Programu Jumuishi ya Malezi, Makuzi na Maendeleo ya  Awali ya Mtoto (PJT MMMAM) ni kuwa na uwekezaji  unaoratibiwa kwenye maeneo matano ya mfumo wa malezi jumuishi ambayo ni Afya Bora, Lishe, Malezi yenye Mwitikio, Fursa za Ujifunzaji wa Awali na Ulinzi na Usalama. Uwekezaji katika huduma za MMMAM huwasaidia Watoto kufikia upeo wa ukuaji timilifu lakini pia unaleta faida kiuchumi.

Naye Afisa Ustawi wa Jamii wa  Mkoa wa Shinyanga,  Bi. Lyidia Kwesigabo alieleza kuwa programu hiyo inahusisha watoto wa umri kuanzia 0-8 kwa sababu umri huo ndio kipindi ukuaji na ujifunzaji huchukua nafasi  kwa kiasi kikubwa kiakili, kimwili, kijamii na kihisia.

Mkurugenzi Mtendaji wa Halmashauri ya Wilaya ya Shinyanga Ndg. Kisena 

Mabuba akizindua  programu Jumuishi ya Taifa ya Malezi, Makuzi na 

Mendeleo ya Mtoto.

Mratibu  wa Afya,  Uzazi na Mtoto wa  Mkoa wa Shinyanga, Bi Halima Hamis 

 akiwasilisha mada wakati wa uzinduzi.

Afisa Ustawi wa Jamii wa  Mkoa wa Shinyanga,  Bi. Lyidia Kwesigabo

akiwasilisha mada wakati wa uzinduzi

Washiriki wakisikiliza kwa makini mada wakati wa uzinduzi

Picha ya pamoja ya Mkurugenzi Mtendaji wa Halmashauri ya Wilaya ya

 Shinyanga Ndg. Kisena Mabuba (katikatika) na wadau kutoka Mashirika

 na Taasisi zinazojihusisha na masuala ya afya, lishe , ulinzi na usalama

 wa mtoto