MWENGE WA UHURU WARIDHISHWA MIRADI YA MAENDELEO HALMASHAURI YA WILAYA YA SHINYANGA

Posted on: July 29th, 2023

MWENGE WA UHURU WARIDHISHWA NA MIRADI YA HALMASHAURI YA WILAYA YA SHINYANGA

Na. Afisa Habari Shinyanga DC

Mwenge wa Uhuru  2023 Halmashauri ya  Wilaya ya Shinyanga umekimbizwa kwa kilomita 94.22 na jumla ya miradi  9 ya maendeleo yenye thamani ya shilingi bilioni 5.346 imezinduliwa, imekaguliwa na kuwekewa Jiwe la Msingi.

 Mwenge wa Uhuru 2023 ukiongozwa na Ndg. Abdalla Shaib Kaim umeridhishwa na utekelezaji wa miradi  yote  katika Halmashauli ya Wilaya ya Shinyanga.

Akiongea na wananchi wa Halmashauri ya Wilaya ya Shinyanga katika Uwanja wa Shule ya Msingi Didia, Ndg. Abdalla Shaib Kaim ameipongeza Halmashauri ya Wilaya ya Shinyanga kwa miradi mizuri yenye ubora na kuzingatia viwango na kusisitiza kuhakikisha kuwa maelekezo yote yaliyotolewa yanafanyiwa kazi.

Aidha Ndg. Abdalla Shaib Kaim ameendelea kueleza kuwa miradi yote ya maendeleo  iliopitiwa na Mwenge wa Uhuru katika Halmashauri ya Wilaya ya Shinyanga  ni miongoni mwa kazi kubwa inayofanywa na  Mhe. Rais wa Jamuhuri ya Muungano wa Tanzania Dkt Samia Suluhu Hassan kwa mapenzi ya dhati kwa Wanashinyanga. Hivyo ahimiza kuendelea kuwa na Umoja na Mshikamano na kumuunga mkono  Mhe. Rais kwa mazuri anayoyafanya.

Miradi iliyopitiwa na Mwenge wa Uhuru ni pamoja na Mradi wa Tenki la Maji Ishinabulandi, Mradi wa ujenzi wa Vyumba  vinne vya Madarasa Shule ya Sekondari Kituli, Mradi wa Vijana Wabunifu Usanda, Mradi wa Hifadhi na utunzaji Mazingira, Mradi wa Kiwanda cha kukoboa na kuongeza thamani ya Mpunga, Mradi wa Gari la wagonjwa na Mradi wa ugawaji Vyandarua.

Kwa upande wake Mkuu wa Wilaya ya Shinyanga Mhe. Johari  Samizi ameshukuru ujio wa Mwenge wa Uhuru Wilaya ya Shinyanga ambao umekuja kumulika na kuanganza mazuri yanayofanywa na Mhe. Rais wa Jamuhuri ya Muungano wa Tanzania Dkt Samia Suluhu Hassan.