mafunzo kwa watumishi wa umma juu ya kutumia planrep na FFARS

Posted on: September 28th, 2017

Mkurugenzi wa Wilaya   amefungua mafunzo ya mfumo wa kielektroniki wa Mipango na Bajet (Planrep) pamoja na mfumo wa  uhasibu na utoaji taarifa unaojulikana kwa Kiingereza kama  (FFARS - Facility Financial Accounting and Reporting System). Mfumo huu wa kielektroniki unasaidia utekelezaji wa utoaji wa rasilimali fedha moja kwa moja kwa ngazi za vituo vya kutolea huduma kwa kuimarisha uhitaji wa kuwepo kwa usimamizi wa fedha katika ngazi ya vituo vya kutolea huduma.  "FFARS itawapatia  watoa huduma mfumo sanifu uliorahisishwa ambao utawezesha kutunza taarifa za kifedha zinazotolewa na zilizopo katika vituo vya kutolea huduma.  FFARS itaweza kufuatilia matumizi ya fedha katika kufikia malengo ya utoaji huduma na kuhakikisha yanaendana na sheria za manunuzi na utoaji taarifa. Taarifa hizi zitasaidia Serikali kuimarisha Mfumo wa Usimamizi wa Fedha za Umma na kuongeza uwazi, kwa jamii. Alisema Mkurugenzi wa Wilaya.

Kuanzia Julai 1, 2017 Serikali ya Jamhuri ya Muungano ya Tanzania iliaanza kupeleka rasilimali fedha moja kwa moja kwenye vituo vya kutolea huduma  kwa ngazi za Halmashauri.  Vituo vya kutolea huduma ambavyo vinapokea fedha hizo vinajumuisha Zahanati, Vituo vya Afya, na Hospitali za Wilaya.  Zoezi hili ni sambamba na inavyotekelezwa kwenye sekta ya elimu, Serikali za Vijiji na Ofisi za Kata.

Mfumo huu mpya wa kupatiwa Rasilimali Fedha unatoa motisha kwa vituo vya kutolea huduma  na kuongeza kipaumbele cha utoaji huduma bora kwa wananchi wa Tanzania na kuongeza usawa na uwazi.  Upelekaji wa Rasilimali Fedha moja kwa moja kwa vituo vya kutolea huduma inahakikisha kuwa Fedha zinazotolewa na Serikali zinatumika kwa matumizi yaliyokusudiwa. Mkakati huu mpya wa kuboresha sekta ya afya  na elimu ni msaada kutoka Shirika la Maendeleo ya Kimataifa la Marekani (USAID), kupitia Mradi wa Uimarishaji wa Mifumo katika Sekta za Umma (PS3).

Mafunzo ya Mfumo wa FFARS yamekusudia kuwawezesha watumishi katika vituo vya Sekta ya Afya na Elimu kupata ujuzi wa namna ya kutumia mfumo wa kielektroniki wa FFARS ambao ndio watumiaji wa mwisho wa mfumo wa FFARS katika  Vituo vya Afya, Zahanati na Shule za Msingi na Sekondari za Wilaya  ya Shinyanga. Mafunzo haya yatahakikisha kuwa watoa huduma katika vituo wana ujuzi unaohitajika katika usimamizi wa fedha na kutoa  huduma bora kwa wananchi wote .

Mfumo huu wa FFARS unatekelezwa kwa ushirikiano baina ya Ofisi ya Rais – Tawala za Mikoa na Serikali za Mitaa (OR-TAMISEMI); Wizara ya Fedha na Mipango; Wizara ya Elimu, Sayansi, Teknolojia na Ufundi; na Wizara ya Afya, Maendeleo ya Jamii, Jinsia, Wazee na Watoto, pamoja na USAID.  Mfumo utatumika katika vituo vyote vya kutolea huduma ya afya na shule, na uhuishaji huu wa mfumo utarahisishia na kuongeza ufanisi katika mifumo ya Serikali ya Tanzania na kuboresha usimamizi na matumizi ya Rasilimali za umma.

Pamoja na mafunzo ya FFARS, pia watumishi watajifunza mfumo mpya na ulioboreshwa wa kupanga bajeti unaojulikana Planing and Reporting (PlanRep) ambao utaanza kutumika kuandaa bajeti ya Halmashauri kwa mwaka 2018/2019. Mfumo huu utapunguza gharama zilizokuwepo wakati wa uandaaji wa bajeti ya Halmashauri kama vile gharama za kutengeza vitabu vya bajeti, gharama za usafiri wa kupeleka bajeti katika ngazi ya mkoa na Wizarani. Kwa maana mfumo utaruhusu uandaaji wa bajeti na utumaji wa bajeti kielektroniki kutoka ngazi ya kutolea huduma hadi wizarani bila kuhitaji watumishi kusafiri.

Mradi wa Uimarishaji wa Mifumo ya Sekta za Umma (PS3), ni wa miaka mitano na unatekelezwa katika mikoa 13 ya Tanzania bara.  PS3 inafanya kazi katika sekta mbalimbali ili kuimarisha mifumo ya mawasiliano, utawala bora, fedha na rasilimali watu, hususani kwa jamii zenye uhitaji.