KIKAO CHA TATHIMINI CHA MKATABA WA LISHE NGAZI YA KATA

Posted on: November 10th, 2023

Watendaji wa Kata Wilaya ya Shinyanga wahimizwa  kusimamia utekelezaji wa mkataba wa lishe.

Maagizo hayo yametolewa na Mkuu  wa Wilaya ya Shinyanga  Mhe. Johari Samizi akiongoza kikao cha tathimini ya utekelezaji wa mkataba wa Lishe kwa robo ya Kwanza Julai –Septemba kwa Mwaka wa Fedha 2023/2024.

Akizungumza katika kikao hicho Samizi amewataka Maafisa Watendaji wa Kata kufanyia kazi makubaliano ya kikao. Pia kutumia vikao na mikutano  katika Kata zao kwa  kutoa Elimu ya lishe ikiwa ni pamoja na kuwaalika Maafisa Lishe katika vikao hivyo .

Mhe. Mkuu wa  Wilaya amewahimiza Watendaji wa Kata zote 26 kuendelea kusimamia na utekelezaji wa afua za lishe katika Kata zao kwa kuzingatia vigezo vya Taifa na kuendelea kutoa Elimu ya umuhimu wa lishe bora pamoja na madhara ya lishe duni.

Aidha, Mkuu wa Wilaya ametoa maelekezo kwa Watendaji wa Kata kuhakikisha wanasimamia Shule zote zinatoa chakula cha mchana kwa Wanafunzi.

Mhe Johari Samizi  alihitimisha kikao hicho kwa kuwataka Maafisa Watendaji wa Kata kuhakikisha wanasimamia Usafi wa Mazingira katika maeneo yao pamoja na kutoa tahadhari ya mvua ya el nino kwa wananchi. Pia kuendelea kuhamasisha Wazazi kwenda kuandikisha Watoto Elimu ya Awali na Msingi.