KAMATI YA SIASA WILAYA YAPONGEZA USIMAMIZI WA MIRADI YA MAENDELEO HALMASHAURI YA WILAYA YA SHINYANGA

Posted on: February 25th, 2024

Kamati ya Siasa ya Chama Cha Mapinduzi (CCM) Wilaya ya Shinyanga Vijijini chini ya Mwenyekiti wake Ndg. Edward Ngelela  Februari  23, 2024  imefanya ziara ya ukaguzi wa miradi ya maendeleo ikiwa ni sehemu ya utekelezaji wa ilani ya Chama  katika Halmashauri ya Wilaya ya Shinyanga.

 Ziara hiyo ya Kamati ya Siasa Wilaya ya Shinyanga Vijijini imehusisha viongozi mbalimbali wa kisiasa wa Chama Cha Mapinduzi ngazi ya Wilaya, Kamati ya Usalama ya Wilaya ikiongozwa na Mkuu wa Wilaya pamoja na Wakuu wa Divisheni na Vitengo (Wataalamu) kutoka Halmashauri ya Wilaya ya Shinyanga.

Miradi iliyotembelewa na Kamati hiyo ni pamoja na ujenzi wa Zahanati Kata ya Isela, Ujenzi wa Bwawa la maji la Nyida, Ujezi wa Shule mpya ya Sekondari ya Puni na mradi wa vyumba viwili vya madarasa vya wanafunzi wa Awali Shule ya Msingi Ihalo.

Akiongea wakati wa ziara hiyo Mwenyekiti wa CCM Wilaya ya Shinyanga Vijijini, Ngelela amesema “Niwapongeze wataalamu wa Halmashauri kwa usimamizi mzuri wa miradi kwani mmehakikisha fedha mlizozipokea zinatekeleza miradi kwa ufanisi na uweledi hivyo nimuagize Mkuu wa Wilaya, Mkurugenzi pamoja na wataalamu wa Halmashauri ya Wilaya ya Shinyanga kuhakikisha mnawalipa wakandarasi kwa wakati na ikitokea Makandarasi anasua sua achukuliwe hatua ili miradi ikamilike kwa wakati uliopangwa."

Aidha, wakati wa ukaguzi wa mradi wa ujenzi wa shule ya sekondari ya Puni, Mwenyekiti wa CCM Wilaya amewataka Wataalam  wa Halmashauri ya Wilaya ya Shinyanga  kutekeleza miradi kwa viwango vya juu. Pia kuhakikisha miradi ya zamani na mipya inakamilika kwa wakati.

Kwa upande wake Mkuu wa Wilaya ya Shinyanga,  Mhe. Johari  Samizi  amemshukuru Mwenyeki wa  Kamati ya Siasa Wilaya ya Shinyanga Vijijini kwa ziara aliyoifanya huku akimhakikishia kutekeleza yote aliyoyaagiza.

Aidha Kamati imeipongeza Serikali chini ya Rais Dokta Samia Suluhu Hassan kwa kuleta miradi mingi ya maendeleo katika Halmashauri ya Wilaya ya Shinyanga ili kuboresha utoaji huduma kwa Wananchi.

Akihitimisha Ziara hiyo Mwenyekiti wa CCM Wilaya amesema kuwa Miradi yenye changamoto ifanyiwe kazi ili ikamilike kwa wakati na kwa ubora unaotakiwa ili Wananchi wapate huduma stahiki.

Kamati ya Siasa ya Wilaya ikikagua  Mradi wa ujenzi wa zahanati Kata ya Isela.

Mwonekano wa sasa wa Jengo la Zahanati ya Isela

Kamati ikikagua chumba cha Maabara Shule ya Sekondari Puni

Mwonekano wa Baadhi ya Vyumba vya Madarasa Shule ya Sekondali Puni

Ziara ya Kamati ya Siasa katika Mradi wa ujenzi  wa Bwala la Maji Nyida

Ukaguzi wa vyumba vya madarasa vya Elimu ya Awali Shule ya Msingi Ihalo.