HALMASHAURI YA WILAYA YA SHINYANGA YAPONGEZWA UTEKELEZAJI MZURI WA AFUA ZA LISHE

Posted on: September 26th, 2024

Mwenyekiti wa Halmashauri ya Wilaya ya Shinyanga, Mhe. Ngassa Mboje amewapongeza madiwani na watendaji wa hamashauri kwa utekelezaji mzuri wa afua za lishe uliopelekea halmashauri kupata kadi alama ya kijani inaashiria utekelezaji uliofikia viwango vizuri. Pongezi hizo amezitoa wakati wa kikao maalum cha madiwani cha kupokea,  kujadili na kupitisha taarifa  ya utekelezaji wa shughuli za lishe kwa kipindi cha Julai 2023 hadi Juni 2024.

Akiwasilisha taarifa ya utekelezaji, Mratibu wa Shughuli za Lishe  Halmashauri ya Wilaya ya Shinyanga, Bw.Said Mankiligo, amesema kuwa Halmashauri kwa kushirikiana na asasi zisizo za kiserikali  ikiwemo Word Vision, Kivulini na TCRS imeendelea kutekeleza afua mbalimbali za lishe  kwa kuzingatia viashiria vya mkataba wa lishe.

Bw. Mankiligo ameainisha  kuwa katika kipindi cha Julai 2023 hadi Juni 2024,, halmashauri imefanya jitihada kubwa  katika utekelezaji wa afua  za lishe  ikiwa ni pamoja na kutenga kiasi cha shilingi 93,908,580 na kutumia kiasi cha shilingi 93,805,044.5 sawa na asilimia 104.

Afua zingine zilizotekelezwa ni utoaji wa huduma ya chakula shuleni, utoaji wa vidonge vya kuongeza  wingi wa damu (FEFO/ IFA) kwa wajawazito, utoaji wa matone ya vitamin A kwa watoto wenye umri wa kuanzia miezi 6 hadi miaka mitano, upimaji wa hali ya lishe  na matibabu ya utapiamlo mkali, uendeshaji siku ya afya na lishe ( SALIKI) , utoaji wa unasihi wa lishe kwa wazazi/walezi wenye watoto kuanzia miezi 0 hadi 23 na kaguzi ya vyakula kila robo.

Naye Mkurugenzi Mtendaji wa Halmashauri, Dkt. Kalekwa Kasanga akizungumza wakati wa kikao hicho, ametoa wito kwa madiwani kuwa mstari wa mbele  katika kuwahamasisha wazazi kuchangia chakula kwa ajili ya wanafunzi kula mashuleni. Amesema kuwa ulaji wa chakula mashuleni utawezesha wanafunzi kuwa na afya njema, kupata ufaulu mzuri na kupunguza utoro.