Wakulima wilayani Shinyanga wanufaika na mradi wa viazi lishe

Posted on: May 27th, 2019

Mradi wa Viazi Lishe"Forgotten Crops Project" unatekelezwa na shirika la " International Potato Center "(CIP) katika Halmashauri ya wilaya ya Shinyanga .Mradi huu unatekelezwa kwa ubia kati ya Halmashauri na shirika la CIP chini ya ufadhili wa Shirika la Misaada la watu wa Marekani (USAID), kupitia kituo cha utafiti "Agriculture Research Institute".

Mradi wa viazi lishe unalenga kuboresha lishe ya watoto chini ya umri wa miaka 5 kupitia viazi lishe ,ambavyo tafiti zinaonesha vina wingi wa Vitamin A ambavyo ni muhimu sana kwa afya ya akili na ukuaji wa mtoto na kuwakinga na maradhi mbalimbali.Pia mradi unalenga kutengeneza fursa za ujasiliamali kwa wakulima, kupitia uzalishaji wa ziada wa viazi lishe ambavyo hutumika kutengenezea bidhaa mbalimbali za kusindika kama  maandazi ,juisi,chapati ,kaukau(crips),tambi,michembe,na matobolwa ambapo mkulima anaweza kuongeza kipato chake kupitia ujasiliamali huo.

Mradi huu unatekelezwa kwa muda wa miezi (18) ambapo kwa sasa upo kwenye mwezi wa 7 wa utekelezaji wake.

Katika Halmashauri ya wilaya ya Shinyanga mradi unafanya kazi katika vijiji 15 ambavyo ni sayu ,pandagichiza,kadoto B, Ng`hama,shatimba,mwampangabule,mwamakaranga,mwabundala,iselamagazi,lyabusalu,mwasingu,mwashilugulu,sumbigu na bukene.

Afisa lishe wilaya bw.Mankiligo said akielezea umuhimu wa  viazi lishe kwa ukuaji wa afya ya mwili na akili kwa watoto.

Malengo ya mradi wa viazi lishe kwa wakulima wa Halmashauri ya wilaya ya Shinyanga ni pamoja na :

• Kuongeza uzalishaji na ulaji wa viazi lishe vyenye wingi wa Vitamin A kwa kutumia teknolojia za lishe na kilimo
• Kuboresha upatikanaji wa elimu ya lishe na kuongeza matumizi ya viazi lishe kwa jamii

Mradi umetekeleza shughuli mbalimbali katika wilaya zikiwemo:

• Mradi umetoa mafunzo kwa wakulima 504 (Me 189, ke 315) juu ya uzalishaji bora wa viazi lishe  katika vijiji 15.
• Kuwezesha wakulima 10, wataalam ngazi ya vijiji 16 na wataalam ngazi ya wilaya 2 kujifunza teknolojia ya uzalishaji wa mbegu salama za viazi lishe kwa kutumia teknolojia ya vitalu wavu (Net tunnels)
• Kuwezesha mafunzo kwa wahudumu wa afya ya msingi ngazi ya kijiji, ambapo wahudumu wa afya ya msingi wapatao 30 wamepatiwa mafunzo ya lishe bora kwa lengo la kufikisha elimu hiyo kwa akina mama wajawazito,wanyonyeshao na wenye watoto chini ya umri wa miaka 5 katika vijiji ambavyo mradi unafanya kazi.Pia mradi umewapatia nyenzo maalumu wahudumu hao kwa ajili ya kufanya kazi hiyo.

Kupitia mradi wa viazi lishe mafanikio mbalimbali yamepatikana ikiwemo:

• Uelewa umeongezeka kuhusu viazi lishe kuliko hapo awali kwamba ni zao la wote
• Vikundi vya wakulima wanaozalisha viazi wameanza kupata faida mbalimbali kama kuboresha afya zao lakini pia kujiongezea kipato kupitia kuuza viazi hivyo na mbegu pia
• Jamii imepata uelewa wa matumizi ya bidhaambalimbali zitokanazo na viazi lishe kama kutengeneza unga wa maandazi ,chapati,uji.